FONNKÈR : "Sét lam la mèr" de Tigrin'sèl

Grin'sèl

Retrouvez chaque samedi, un fonkézèr de l'île des poètes.

Réunion la 1ère Publié le


SÉT LAM LA MÈR

Sét la mér na poin asé po détoil mon zié
Mon bous lé amèr la rak mon lang po lankostiké
Trang mon manzé, kapay mon Bondié, dékrèp mon sové
Zistoir mon zansèt ziska zot i rod po kontrofé

Lékim mon guél finn ak ek silens mon dédan
Révolision mon fièl i dmann ganidan momon
La plim mon zèl finn frél i anbar pi lo van
Vanz la vi po lo mo tir zimèr dàn lo zo, lé pliskétan, lé pliskétan

In zarboutan la désot la vi, la pa lès anou vaniki
Farfar i débord ou la ranpli, manzé po nou dopi tannti
Lo sièl la invit in véli, la rann zalou bann maloki
La rénion lé anvoidfami, nout tout si mèm livrédfami

Aou aou Dédé mi di a ou gran mersi
In lonèr ou la fé, ou la travèrs mon vi
Tangaz la pété, la niabou tandri mon ri
Lansor moin la tienbo, gard samilé zordi

Ou kas mon somey po koz ek moin, pa niabou di a ou rien
Tir moin dàn li ponkor granmatin, mi akout a ou anin
Hein hein moin la konpri, somin granboi sa lé loin
Tipa tipa sofkoman ou la finn déblay somin

Tipédtan ma finn dèf gatir mon léspri, kozman mémé la pa in goni
Tir pa kart kouri, rod pa po suiy zot pat dési
Sankoi mon lang an sabouk, va tay zot zaré an sopsuiy
Talér mon bébét wa monté, dàn marmit li la po bouiy

Larg mon lourlé, kit a moin ek mon kayanm
lo son roulér pa rienk po vindésanm
Tanbouré po sarèt bèf avan la koup kann
Piknik somin volkan, kari bisik rogay manng

Mars pat atèr, ou di moin lé makot
Manz ek la min, ou trouv sa vilin
Po mon kiltir, mi dovien patriot
Lo bann lakaparèr i mérit in kalot

ras mon tèr dàn mon min, fout a moin dàn park lapin
Trèt amoin zilétré, y di mi konpran pa ariyin
Manzé sal pa dàn loz, en poundiak dàn magazin
Bainy anou dàn la grés, ladiabèt po rony nout rin

La pa po sa sak gramoun la fé, va fini dàn kanal
Tèt zordi mon nasion lé enkor bankal
Touléka zalowouin i anplars arpa granmérkal
tizan grandiab pofé ri, fé pèr nout bann ti valal