FONNKÈR : "Ma trouv inn ti plas" de Monique Séverin

FonnkerMS

Retrouvez chaque samedi, un fonkézèr de l'île des poètes.

Réunion la 1ère Publié le


 MA TROUV INN TI PLAS

Ti fiy
Gard in kou dann fin fon out kèr
Si na poin inn ti plas pou moin
In ti plas pou in boug kom moin
Inn ti plas pou in boug mon koulèr
Ma done aou... tou sat mi gingn done aou
Mon kozé i vavang
Mon kozé i koutkongn
Dan mon tèt na fénoir...
Éskiz amoin
La pa apran amoin
Koz an lo sikré

Mon Kaf...
Si mi di atoué mon kaf
La pa pou ton koulèr
Ton koulèr koulèr La Rénion
Ton kozé kozé La Rénion
Si ou na lamour pou gaté
Si dann out tèt na lanvi viv dobout
Ma trouv inn ti plas dans mon kèr
Ma trouv inn ti plas pou sat
Va sèr ma min for
Kan marmay va arivé
Ma trouv inn ti plas pou sat
Va di amoin ek son zié
Moin sé lo pli zoli
É si in zour boug la
I rod pou maroné
Ma done ali la min
Ma done ali lamour